سیرتِ نبویؐ میں تنقید کی بنیاد خیرخواہی اور عدل محوری پر استوار ہے

عالمی مجمعِ شیعہ شناسی کے سیکریٹری جنرل نے کہا ہے کہ رسولِ اکرم ﷺ کے فکری اور عملی نظام میں تنقید کسی رکاوٹ کا نام نہیں بلکہ سماجی اصلاح اور کمال کی ایک بنیادی اور ناگزیر عملی صورت تھی، جس کی اساس خیرخواہی، عدل محوری اور شوریٰ و مشاورت کے فروغ پر قائم ہے۔
آیت پیمان، عالمی مجمعِ شیعہ شناسی کے سیکریٹری جنرل نے کہا کہ آج کی دنیا میں جہاں تناؤ اور اختلافِ رائے تیزی سے بڑھ رہے ہیں، وہاں الٰہی تعلیمات اور دینی پیشواؤں کی سیرت کی طرف رجوع بہت سے مسائل کے حل کی راہ ہموار کر سکتا ہے۔ اسی تناظر میں، اختلافِ رائے اور تنقید کے حوالے سے رسولِ اکرم ﷺ کے طرزِ عمل کا مطالعہ ہمارے لیے نہایت قیمتی اسباق رکھتا ہے۔
رسولِ اکرم ﷺ نہ صرف ایک دینی و سماجی نظام کے بانی تھے بلکہ اختلافات کے نظم و نسق اور معاشرتی ہم آہنگی کے تحفظ میں ایک بے مثال نمونہ بھی پیش کیا۔ آپؐ کی سیرت برداشت، مکالمہ، عدل اور اخلاقی اقدار کے فروغ پر مبنی تھی اور آپؐ ہمیشہ تنقید کو توجہ سے سنتے، ضرورت پڑنے پر معذرت کا اظہار کرتے اور منطقی و استدلالی انداز میں جواب دے کر اختلافات کے حل کی کوشش فرماتے تھے۔
بالخصوص، رسولِ اکرم ﷺ کا عوامی مفاد کو پیشِ نظر رکھنا اور معاشرتی وحدت و انسجام کو ترجیح دینا اس امر کی علامت ہے کہ آپؐ کو اجتماعی اتحاد کی اہمیت کا گہرا ادراک تھا۔ مکہ اور مدینہ کے مختلف ادوار میں آپؐ کو متعدد اختلافات اور کشیدگیوں کا سامنا رہا، تاہم آپؐ نے سفارت، گفت و شنید اور منصفانہ فیصلوں کے ذریعے ان مسائل کو حل کیا اور معاشرے میں امن و سکون کو برقرار رکھا۔
ایکنا کے نمائندے نے عالمی مجمعِ شیعہ شناسی کے سیکریٹری جنرل آیت پیمان سے گفتگو میں رسولِ اکرم ﷺ کی سیرت میں تنقید اور اختلاف کے نظم و نسق کے مقام کو علمی اور تاریخی زاویوں سے واضح کیا، جس کی تفصیل درج ذیل ہے۔
ایکنا: رسولِ اکرم ﷺ کی سیرت میں تنقید کے تصور کا علمی مقام کیا ہے؟
رسولِ اعظم ﷺ کے فکری و عملی نظام میں تنقید کو سماجی اصلاح اور تکمیل کا ایک بنیادی عمل سمجھا جاتا تھا، نہ کہ کوئی رکاوٹ۔ اس کی حیثیت خیرخواہی کی اصالت، عدل محوری اور شوریٰ و مشاورت کے استحکام پر مبنی تھی۔
تنقید اسی وقت قابلِ قبول اور معتبر سمجھی جاتی تھی جب وہ حسنِ نیت اور حقیقی اصلاح کے مقصد کے ساتھ ہو، نہ کہ تفرقہ یا شخصی تخریب کی نیت سے۔ اسی لیے خیرخواہی کی اصالت تعمیری تنقید اور بدنیتی پر مبنی حملے کے درمیان حدِ فاصل متعین کرتی ہے۔
رسولِ اکرم ﷺ خود کو بھی تنقید کے لیے پیش کرتے تھے کیونکہ عدل کا تقاضا ہے کہ کوئی بھی شخص، حتیٰ کہ معاشرے کا رہنما بھی، عقل اور حق کی کسوٹی سے بالاتر نہ ہو۔ یہ امر قرآنِ کریم کی اس آیت سے ہم آہنگ ہے کہ کہہ دیجیے میں تمہاری ہی طرح ایک بشر ہوں، میری طرف وحی کی جاتی ہے۔ اس سے عدل محوری کی وہ بنیاد واضح ہوتی ہے جو انسانی فہم اور ممکنہ بشری لغزشوں کے ادراک کی اجازت دیتی ہے، اگرچہ وحی کے مقام پر عصمت برقرار رہتی ہے۔ مزید یہ کہ تنقید کی قبولیت مشاورت کی اہمیت اور فیصلہ سازی سے قبل مسئلے کے مختلف پہلوؤں کو سمجھنے پر زور دیتی ہے۔
ایکنا: خیرخواہ تنقید اور مغرضانہ حملے میں فرق بہت اہم ہے، سیرتِ نبویؐ میں ان دونوں سے برتاؤ کیسے کیا گیا؟
رسولِ اکرم ﷺ کی سیرت ایک متوازن اور مکالماتی طرزِ عمل کی عکاس ہے۔ خیرخواہ ناقد کے ساتھ آپؐ کشادہ دلی، تحمل اور منطقی جواب دہی کا مظاہرہ کرتے تھے۔ آپؐ پوری توجہ سے سنتے، اگر تنقید درست ہوتی تو فوراً اصلاح فرماتے، جو عاجزی کی اعلیٰ مثال ہے، اور اگر درست نہ ہوتی تو مضبوط دلائل کے ذریعے حقیقت واضح فرماتے تھے۔
اس کے برعکس، جب ناقد کا مقصد اصلاح کے بجائے اذیت یا رکاوٹ ڈالنا ہوتا، تو رسولِ اکرم ﷺ وقار کو برقرار رکھتے ہوئے قاطعانہ رویہ اختیار فرماتے۔ ابتدا میں نصیحت اور اتمامِ حجت کی جاتی، جیسا کہ منافقین یا بعض قریشی افراد کے ساتھ ہوا، اور اگر یہ روش جاری رہتی تو فاصلہ اختیار کر کے یا واضح تنبیہ کے ذریعے اسلامی معاشرے کی سرخ لکیریں متعین کی جاتیں تاکہ سماجی بنیادوں کو کمزور ہونے سے بچایا جا سکے۔
ایکنا: کیا سیرتِ نبویؐ میں تعمیری تنقید کی قبولیت اور اصلاحی اقدام کی کوئی واضح تاریخی مثال موجود ہے؟
اس کی نمایاں مثال غزوۂ حنین کے بعد غنائم کی تقسیم کا واقعہ ہے، جسے متعدد سیرت نگاروں، بشمول ابن ہشام، نے نقل کیا ہے۔ اس موقع پر رسولِ اکرم ﷺ نے نو مسلم افراد، جنہیں مؤلفۃ القلوب کہا جاتا تھا، کو نسبتاً زیادہ حصہ عطا فرمایا، جس پر بعض انصار کو اعتراض ہوا۔
سعد بن عبادہ نے انصار کی نمائندگی کرتے ہوئے رسولِ اکرم ﷺ سے اس تقسیم پر گفتگو کی۔ آپؐ نے نہ صرف انصار کو ملامت نہیں کی بلکہ کشادہ دلی سے فرمایا کہ میں دلوں کو جوڑنے کے عمل میں ہوں۔ اس سے ظاہر ہوتا ہے کہ آپؐ نے تنقید کو سنا، مگر اعلیٰ تر مصلحت یعنی نئے مسلمانوں کے اتحاد کو مدنظر رکھتے ہوئے اپنے فیصلے کی وضاحت فرمائی۔ اس کے ساتھ ساتھ، انصار کے مقام و مرتبے کو بھی بھرپور انداز میں تسلیم کیا، جو اس بات کی تعلیم دیتا ہے کہ تنقید کو قبول کرتے ہوئے بھی مجموعی حکمتِ عملی کو محفوظ رکھا جا سکتا ہے۔
ایکنا: نوجوانوں کی تنقید یا اعتراضات کے مقابلے میں رسولِ اکرم ﷺ کا طرزِ عمل کیا تھا؟
نوجوانوں سے گفتگو سیرتِ نبویؐ میں اعتماد سازی، بروقت ذمہ داری سپرد کرنے اور ان کی توانائی کے احترام پر مبنی تھی۔
رسولِ اکرم ﷺ نوجوانوں کو محض غیر فعال مخاطب نہیں سمجھتے تھے بلکہ انہیں قیادت اور عسکری ذمہ داریاں سونپتے تھے، جیسا کہ کم عمری میں اسامہ بن زید کو سپہ سالار مقرر کرنا۔ یہ اس بات کی علامت ہے کہ نوجوانوں کی رائے اور عمل کو اہمیت دی جاتی تھی۔
آپؐ نوجوانوں سے گفتگو میں سخت لہجہ یا طنزیہ انداز اختیار نہیں کرتے تھے بلکہ شفقت آمیز، تربیتی اور حوصلہ افزا اسلوب اپناتے تھے تاکہ ان کی تخلیقی صلاحیتیں پروان چڑھ سکیں۔ روایات سے معلوم ہوتا ہے کہ آپؐ ہمیشہ نوجوانوں کو غور و فکر اور درست انتخاب کی تلقین فرماتے تھے۔